Akala Ko...

Pagkalembang ng batingaw

Aking puso'y napapahiyaw

Lumulukso sa pagdating

Ng ginaw na dala ng

Nagsisimulang araw

Magsisimbang gabi na naman ako

Kasama mo

Maririnig ko nang muli

Ang tinig mong inaawit

Ang himig ng Pasko

Sa simula ng pagdarasal ko

Ngalan mo'y agad sa puso ko

Sana nama'y idulot N'yang

Mabago ko ang mundong

Iaalay ko sa 'yo

Sa araw ng Pasko magsisimba ako

Kasama mo

At doon ko iaabot ang anumang nabago ko

Kasama 'tong aking inaawit

Ipamamalas ko ang pag-ibig na nadarama sa 'yo

Katulad ng pagmamahal

Na sanhi ng pagdiriwang

Nitong ating Pasko

O giliw ko

At sa araw na ito alalahanin mo'ng handang-handa akong

Maging kapiling mo

Kahit matapos na itong Pasko

Naalala mo pa ba, mahal, noong kantahin natin ito nakaraang Pasko? Nagtawanan pa tayo pagkatapos dahil kinanta mo 'yung dapat na parte ko. Nakaupo tayo at yakap-yakap mo ako, habang kumakanta tayong nakatingin ako sa mga mata mong maamo at hinahaplos ko ang iyong mukha.

Higit na sa isang taon ang nakalipas, mahal, 'di pa rin kita matanggal sa aking puso't isipan. Pilit kong tinatanggihan ang sarili ko sa pag-asang 'pag dumating ang panahon ay magiging akin ka nang tunay. Isa ka lamang panaginip -- maganda, masarap alalahanin, ngunit hindi totoo. Tama ang mga kaibigan ko, dapat na kitang pakawalan. Inuunti-unti ko araw-araw.

Ngunit nang tanungin kita kagabi tila ikaw ang ayaw bumitaw sa akin. 'Di ko maintindihan. Akala ko ba desidido ka na? Akala ko ba wala nang makapagbabago pa ng isip mo? Kung kailan unti-unti ko nang natatanggap ang mapait na katotohanan, saka ko ito malalaman. Ngayon hindi ka sumasagot. Wala kang imik. Tameme ka naman. 'Di mo alam paano sagutin ang mga tanong ko. Sinabi mo sa akin noon at inulit mo kagabi na takot kang mawala ako sa 'yo. Akala ko tapos na 'yan. Akala ko sabay tayong bumibitaw sa isa't isa. Bakit ka ganito ngayon? Ano'ng nangyayari sa 'yo, mahal ko...?

Mahal... Pagod na ang puso ko... Ayaw ko nang umasa... Handa na akong umusad... Takot din naman akong mawala ka pero 'di na maganda ang nangyayari sa atin... sa 'yo... Hangad ko lang naman ang kaligayahan mo, pero ngayon, 'di ko na alam kung tama ba itong ginagawa ko. Hindi ko na alam kung ano'ng dapat kong gawin... Hindi ko na alam... :(